Hvaðan kemur hugmyndin að Degi rauða nefsins?

Hugmyndin kemur frá bresku góðgerðarsamtökunum Comic Relief og varð til vegna hungursneyðarinnar í Eþíópíu árið 1985. Árið 1988 stóðu Comic Relief fyrir fyrsta Degi Rauða nefsins (e. Red Nose Day) og síðan þá hefur Dagur rauða nefsins verið haldinn annað hvert ár til að safna fé til hjálparstarfs í Afríku og stundum til bágstaddra í Bretlandi. Það er gert með ýmsum uppákomum og glensi þar sem þjóðþekktir skemmtikraftar gefa vinnu sína.

Hvað er Comic Relief?

Richard Curtis, breskur grínisti, stofnaði Comic Relief samtökin árið 1985 til að sporna við hungursneyðinni í Eþíópíu. Richard er þekktur m.a. fyrir þættina Blackadder og Mr. Bean og gerði hann handrit að kvikmyndunum Love Actually, Four Weddings and a Funeral og Notting Hill.

Meginmarkmið samtakanna eru að hjálpa fólki um allan heim sem á um sárt að binda, enda fátækt og berjast gegn hvers kyns óréttlæti í Bretlandi. Það gera samtökin með því að virkja almenning í frumlegum og skemmtilegum verkefnum og safna þannig fé til starfsins.

Dagur rauða nefsins er langstærsti fjáröflunardagurinn á vegum samtakanna þar sem hver eyrir fer rakleiðis til fyrirfram ákveðins góðgerðarmálefnis. (Comic Relief heldur einnig utan um aðra viðburði eins og t.d. Sport Relief, þar sem íþróttamenn aðstoða við fjáröflunina, en allir miða þeir að því sama ? að safna fé til góðgerðarstarfa).

Hugmyndafræði Comic Relief samtakanna er að beita kímni og hlátri til að koma alvarlegum boðskap til skila. Þannig eru þjóðþekktir grínistar í fararbroddi samtakanna og frá 1985 hafa yfir 2050 skemmtikraftar gefið vinnu sína til styrktar hinum ýmsum verkefnum. Þar má telja Lenny Henry, John Cleese, Jerry Springer, Johnny Depp, Ali G, Little Britain, Robbie Williams, Woody Allen, Rowan Atkinson o.s.frv. Það eru ekki til sambærileg hjálparsamtök á Íslandi þó svo að góður hópur leikara og grínista séu helstu þátttakendur í Degi rauða nefsins hér á landi.

Hvers vegna rautt nef?

Rauða nefið er tenging við hlátur og gleði. Þar sem söfnunin miðar að því að gleðjast og gleðja aðra er upplagt að gera það með rauðu nefi. Við viljum að fólk hafi gaman af því að gefa og stuðla að því að hláturinn lengi lífið ... í bókstaflegri merkingu.

Af hverju var ákveðið að fara þessa leið á Íslandi, þ.e. að nota Dag rauða nefsins?

Fjáröflunardagurinn, Dagur rauða nefsins, hefur gengið ótrúlega vel í Bretlandi og fest sig í sessi þar sem einn af stærstu góðgerðarviðburðum landsins. Hann gefur fólki sérstakt tækifæri til að kynnast verkefnum hjálparstofnana og þeim vandamálum og þeirri neyð sem alltof margir eiga við að etja í heiminum.

Hvað kostar rauða trúðanefið?

800 krónur. Reynt er að halda verðinu í lágmarki því enginn má vera útundan!

Hvað kostar að framleiða rautt nef?

Kostnaður við eitt rautt nef með kassa og öllu var um 70-80 krónur árið 2006. Vegna hækkunar á bensínverði, gengi krónunnar og öðrum þáttum er kostnaður við nefið í ár hátt í 150 krónur. Útsöluverð á nefinu er einungis 800 krónur, en gefur bæði af sér bros þeirra í kringum þig og stuðning til verkefna Barnahjálparinnar með bágstöddum börnum um allan heim, hvað gæti verið betra?

Hvernig kaupi ég rauða nefið?

Nefin eru seld í verslunum Bónuss og Hagkaupa um allt land frá og með föstudeginum 20. nóvember. Nefin fást einnig á skrifstofu UNICEF að Laugavegi 42, 2. hæð.

Þú getur einnig pantað þér nef í síma 562 6262 eða sent okkur tölvupóst á unicef@unicef.is. Við seljum nefin 56 saman í kassa. Hægt er að sækja pöntuð nef á Laugaveg 42, en ef þú vilt fá þau send heim að húsi leggst sendingarkostnaður á verðið.

Hvernig get ég nálgast lag Ljótu hálfvitanna?

Hér á síðunni getur þú hlaðið niður laginu þér að kostnaðarlausu og tjúttað til jóla.

Hvernig get ég lagt mitt af mörkum?

Allt gengur þetta út á að leggja sitt af mörkum til bágstaddra barna með því að skrá sig sem heimsforeldri. Þú getur einnig tekið þátt í deginum með því að hlusta á Bylgjuna vikuna 31. nóvember til 4. desember, horfa á Stöð 2 föstudaginn 4. desember og kaupa rautt trúðanef.

Þú getur skráð þig sem heimsforeldri á http://www.unicef.is/heimsforeldrar_skraning eða hringt í 562 6262.

Hvernig getur mitt fyrirtæki / vinnustaður lagt sitt af mörkum?

Fyrirtæki og vinnustaðir eru sérstaklega hvött til að kaupa rauð nef. Fyrirtæki geta líka hvatt starfsmenn sína til að gerast heimsforeldrar og styrkja þannig gott málefni mánaðarlega. Fylgist líka vel með á Bylgjunni.

Ef fyrirtæki vilja gefa stórar peningagjafir er hægt að hafa samband á skrifstofu UNICEF í síma 552 6300.

Í hvaða verkefni fara peningarnir?

Þeir fara í almenn verkefni UNICEF og til þeirra barna sem mest þurfa á honum að halda. UNICEF starfar aðallega á fimm sviðum, þ.e. heilsuvernd, menntun, HIV/alnæmi, vernd og umönnun fyrstu ár ævinnar. Sjá nánar á heimasíðu UNICEF, www.unicef.is.

Hversu stór hluti peninganna rennur til góðgerðarmála?

UNICEF nýtur mikils stuðnings frá samstarfsfyrirtækjum og velunnurum sem styðja við framkvæmd Dags rauða nefsins. Þegar eimsforeldrar gefa til UNICEF rennur 80-100% fjármagnsins í verkefni fyrir börn. Mjög lítill hluti fer í samskipti við heimsforeldra og aukna fjáröflun en það hefur sýnt sig að hverri krónu sem varið er í fjáröflun skilar sér fjórfalt til baka á einu ári.

Hvernig vitum við að fjárstyrkurinn er notaður til hjálparstarfa?

UNICEF er rekið af frjálsum framlögum og þarf að standa skil á öllu fjármagni sem til samtakanna rennur. UNICEF starfar eftir mjög ströngum reglum og eru samtökin undir eftirliti utanaðkomandi aðila.

UNICEF er með opið og gagnsætt bókhald og fjárreiður. Deloitte endurskoðar alla reikninga UNICEF á Íslandi samtökunum að kostnaðarlausu, auk þess sem samtökin á Íslandi verða að standa skil gagnvart UNICEF alþjóðlega. Ársskýrslur UNICEF á Íslandi og UNICEF alþjóðlega eru aðgengilegar á www.unicef.is/arsskyrslur.

Hver er kostnaðurinn við sjónvarpsútsendinguna/framkvæmdina/ferðirnar út og þess háttar?

Á degi rauða nefsins eru það leikarar og skemmtikraftar sem gefa vinnu sína og gerir það alla framkvæmd miklu ódýrari. Stöð 2 annast sjónvarpsútsendinguna og UNICEF sér um ferðalög til Afríku. Reiknað er með að heildarkostnaður við útsendingu, ferðalög til Afríku, upptökur erlendis, stjórnun verkefnisins, kynningarefni, nefin og annar tengdur kostnaður verði rúmar 12 milljónir króna (áætlað), reynt er að halda öllum kostnaði í lágmarki og reynsla UNICEF sýnir að peningur sem eyddur er í fjáröflun með þessu hætti skilar sér margfalt til baka. Á degi rauða nefsins árið 2006, fyrir hverja krónu sem eytt var í DRN komu 7 krónur tilbaka!

Fá þeir sem koma fram borgað fyrir vinnu sína?

Allir leikarar og listamenn gefa vinnu sína. (Tæknifólk er í vinnu hjá Stöð 2 og Saga Film).

Hverjir eru helstu samstarfsaðilar Barnahjálparinnar á Degi rauða nefsins?

Það taka allir höndum saman en án efa leggja leikarar og skemmtikraftar til mikla vinnu, Stöð 2 og Saga Film sjá um sjónvarpsþáttinn. Hvíta Húsið gefur góðan afslátt af sínu starfi.

Hversu miklum peningum hefur verið safnað erlendis með átakinu hingað til?

Í Bretlandi verða upphæðirnar alltaf hærri og hærri, eftir því sem Dagur rauða nefsins er haldinn oftar. Alltaf slá þeir nýtt met í söfnun. Árið 1988 söfnuðust 15,8 milljónir punda og árið 2005 söfnuðust rúmlega 65 milljónir punda. Söfnunarféð hefur aðeins farið vaxandi því árið 2007 söfnuðust tæplega 68 milljónir punda og árið 2009 söfnuðust 80 milljónir punda.

Er ætlunin að gera daginn líkari því sem hann er í Bretlandi, þ.e. að almenningur geti safnað og gefið svo ágóðann?

Dagur rauða nefsins var haldinn í fyrsta sinn hér á landi árið 2006 og gekk þá vonum framar. Alls bættust hátt í 4000 heimsforeldrar í hópinn. Það verður spennandi að sjá hvernig dagurinn festir sig í sessi hér á landi, en við vonum að sem flestir taki þátt í átakinu og sýni gjafmildi og góðsemi.

Í hversu mörgum löndum er Dagur rauða nefsins haldinn?

Ástralir, Þjóðverjar, Bretar og Bandaríkjamenn hafa allir haldið Dag rauða nefsins og hefur dagurinn fest sig í sessi í öllum þessum löndum.

Er Dagur rauða nefsins á Íslandi í einhverjum tengslum við Red Nose Day í Bretlandi?

UNICEF er í miklum tengslum við Red Nose Day í Bretlandi og í formlegu samstarfi. UNICEF á Íslandi hefur fengið leyfi hjá þeim til að nota hugmyndina hér á landi.

Hvers vegna að blanda saman gríni og neyð barna um allan heim?

Ætlunin er að leggja áherslu á að það er gaman að gleðja börn sem búa í sárri neyð með því að styðja við þau. Það gerum við best með fjárframlögum og opnum hug. Íslenska máltækið ?hláturinn lengir lífið? á vel við hér því með því að safna fé á skemmtilegan og jákvæðan hátt og fá að njóta fjölbreytilegrar dagskrár þar sem gleðin og hláturinn eru í fyrirrúmi, getum við orðið öðrum að liði.

Við hjálpum jú engum með samviskubit og samanbitnar varir. Við hjálpum mest með því að gefa með bros á vör.

Hversu mörg börn njóta góðs af þessu átaki?

Sem heimsforeldri styður þú verkefni sem gagnast mörgum börnum og styrkurinn fer þangað sem þörfin er mest hverju sinni. Með þátttöku sem flestra í Degi rauða nefsins má gera ráð fyrir að milljónir barna muni á einhvern hátt njóta góðs af. Hvort sem barn fái alnæmislyf, að kennari þess hljóti þjálfun, að þau fái hreint vatn, bólusetningu, skólagögn eða að fyrrum barnahermenn sameinist fjölskyldum sínum... Og svona mætti lengi telja.

Get ég rakið hverja krónu sem ég gef til UNICEF til einhvers ákeðins verkefnis?

Nei. Það er kostnaðarsamt að eyrnamerkja peninga og UNICEF starfar ekki þannig að fjárframlag renni til eins ákveðins barns. Heimsforeldrar geta hins vegar verið vissir um að fjárframlögum þeirra fari til barna sem eiga um sárt að binda um allan heim.